Adxudicado o proxecto da ampliación do Polígono Industrial de Carballo.

No día de onte o Instituto Galego de Vivenda e Solo, dependente da Consellería de Medio Ambiente Territorio e Vivenda, adxidicou o proxecto de ampliación do Parque Empresarial de Bértoa en Carballo. Esta ampliación permitirá que o noso polígono industrial siga medrando e sendo referente en Galicia e no Noroeste de España, formando parte do Eixo Industrial Arteixo-Laracha-Carballo.

A Xunta de Galicia destinará un total de 62.436 euros á redacción do proxecto de interese autonómico (PIA) da ampliación do parque empresarial de Bértoa, en Carballo, unha vez que onte se adxudicou o contrato á empresa Proyfe S.L.

Unhas obras que se desenvolverán en dous ámbitos de actuación, ao leste da primeira fase ao longo do perímetro da estrada de acceso da autoestrada (Sector A: 443.226 m2) e ao oeste da segunda fase ocupando o perímetro da autoestrada AG-55 (Sector B: 110.781 m2).

Con esta ampliación de 554.007 metros cadrados a nosa área empresarial alcanzará 1.800.000 metros cadrados brutos de superficie., máis da metade dos cales (52%) son xa propiedade do Instituto Galego da Vivenda e Solo.

A redacción do Proxecto de Interese Autonómico, foi licitada a finais do 2021. A previsión que se manexa é que o documento se envíe á Consellería de Medio Ambiente, Territorio e Vivenda no mes de outubro e reciba a aprobación inicial a comezos do vindeiro ano.

En datas próximas modificarase o uso do Sector F2 (22.598 m2); que ten un uso terciario e, a petición da propia asociación de Empresarios será modificado para poder ser destinado a uso Industrial quedando dispoñible unha superficie, sumando as parcelas dispoñibles neste momento, de 36.000 m2 para aquelas empresas que estén interesadas en implantarse en Carballo.